Display:
అధ్యాత్మ సంకీర్తన
రేకు: 3-2
సంపుటము: 1-15
తాళ్లపాక అన్నమాచార్య
రాగము: వరాళి
ఎవ్వారు లేరూ హితవు చెప్పఁగ వట్టి-
నొవ్వులఁ బడి నేము నొగిలేమయ్యా
॥పల్లవి॥
అడవిఁ బడినవాఁడు వెడలఁ జోటులేక
తొడరి కంపలకిందు దూరినట్లు
నడుమ దురితకాననములతరిఁ బడి
వెడలలేక నేము విసిగేమయ్యా
॥ఎవ్వారు॥
తెవులువడినవాఁడు తినఁబోయి మధురము
చవిగాక పులుసులు చవిగోరినట్లు
భవరోగములఁ బడి పరమామృతము నోరఁ
జవిగాక భవముల చవులాయనయ్యా
॥ఎవ్వారు॥
తనవారి విడిచి యితరమైనవారి-
వెనకఁ దిరిగి తా వెఱ్ఱైనట్లు
అనయము తిరువేంకటాధీశుఁ గొలువక
మనసులోని వాని మఱచేమయ్యా
॥ఎవ్వారు॥
AndhraBharati AMdhra bhArati - telugu కీర్తన సాహిత్యము