Display:
శృంగార సంకీర్తన
రేకు: 1448-5
సంపుటము: 24-287
తాళ్లపాక అన్నమాచార్య
రాగము: దేసాళం
నీయిచ్చలోదాన నేను నీ యితవే చూతుఁగాక
ఆ యింతిని మారుకొన నరుదా నాకు
॥పల్లవి॥
యెలమి నీచిత్త మెప్పు డెట్టుండునో అనికాక
నెలఁతతోఁ బంతమాడనేరనా నేను
చెలికి నేమేమి బాసచేసితివో అనికాక
తలకొని మట్టుపెట్టఁదడవా నాకు
॥నీయి॥
యీసతిపై నే మోహ మెంతగద్దో అని కాక
వూసివాసు లెంచి మీరనోపనా నేను
వేసటతో నీమోము విన్ననౌనో అనికాక
తోసి యాపెయెమ్మె మాన్పదొడ్డా నాకు
॥నీయి॥
చెలఁగి నీవేడుకలు చెల్లింతు ననికాక
యలయిం చాపెను గెల్వ నెదురా నాకు
అలమేల్ మంగనే నేను అట్టె శ్రీవేంకటేశుడ
కలసితాపెను సాటిగలదా నాకు
॥నీయి॥
AndhraBharati AMdhra bhArati - telugu కీర్తన సాహిత్యము