ఆంధ్రభారతి - తాళ్లపాక అన్నమాచార్య కీర్తనలు - తానే వచ్చీఁగాక తరవులు వెట్టనేల - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1491-4
సంపుటము: 24-544

తాళ్లపాక అన్నమాచార్య

రాగము: సామంతం

తానే వచ్చీఁగాక తరవులు వెట్టనేల కానుకలు మీచేనంపి కక్కసించవలెనా	॥పల్లవి॥
తలఁపులం బారితేనే తనువులు సోఁకినట్టు అలయించి యతనిమే నంటవలెనా చెలిమిసేసితేనే చేతికిలోనైనట్టు చెలులచే రమ్మని చెప్పించవలెనా	॥తానే॥
కమ్మి సుద్దులు వింటేనే కాఁగిలించుకొన్నట్టు సమ్మతిచేసి చేతులు చాఁచవలెనా పిమ్మటఁ బేరుకొంటేనే ప్రేమం దనివైనట్టు రమ్మని పిలిపించి రతిసేయవలెనా	॥తానే॥
యీడకు విచ్చేసితేనే యెడవాయకుండినట్టు జోడైయుండ నొడఁబఱచుకోవలెనా కూడె శ్రీవేంకటేశుఁ డిక్కున నలమేల్మంగను జాడతోడ తనమోవి చవిచూపవలెనా	॥తానే॥