Display:
శృంగార సంకీర్తన
రేకు: 1596-5
సంపుటము: 25-455
తాళ్లపాక అన్నమాచార్య
రాగము: దేసాళం
ఇందరిలోనా నీకు నేఁటికి రట్టు
పొందులు సేసుక అట్టె బుజ్జగించవయ్యా
॥పల్లవి॥
వీడెము చేతికిచ్చి వెలఁది నీతోనవ్వఁగ
యేడ చూచేవయ్య నీకు నెంత పరాకు
ఆడరానిమాటలాడీ నందుకే కోపగించుక
కొడెకాఁడ వాపె నిట్టె కుస్తరించవయ్యా
॥ఇం॥
చేసన్న చేసి ఆపె చెనకి నిన్నుఁ జూడఁగ
యేసుద్దులు చెప్పేవయ్య ఇదె నాతోను
వాసితో నిందుకే యాపె వట్టినేరములు వేసీ
వేసాలగుట్లు మాని వేఁడుకొనవయ్యా
॥ఇంద॥
అలమేలుమగ నిన్ను నట్టె కాఁగిలించఁగాను
నిలుచుండే వేమయ్య నివ్వెరగుతో
అలరి శ్రీవేంకటేశ అందు కాపె వురమెక్కె
చెలి నేను; ఆపెనే చెక్కునొక్కవయ్యా
॥ఇంద॥
AndhraBharati AMdhra bhArati - telugu కీర్తన సాహిత్యము