Display:
శృంగార సంకీర్తన
రేకు: 1639-5
సంపుటము: 26-232
తాళ్లపాక అన్నమాచార్య
రాగము: నాగవరాళి
ఊరకుండితేఁ గనక వుడివోవు పాయము
దూరి బుద్ది చెప్పి పతిఁ దోడి తేఁగదరే
॥పల్లవి॥
బడి వాయకుండితేనే భావమలు గరఁగును
వొడలు సోఁకితేఁ దమి పుట్టిపడును
నిడువక చూచితేనే వేడుకలు పెచ్చురేఁగు
చిడుముడి మాఁటాడితే సిగ్గు గొంత దేరును
॥ఊర॥
సెలవుల నవ్వితేనే చేఁగలించు మోహము
పిలిచి పేరుకొంటేనే ప్రియము పుట్టు
వలపులు చల్లితేనే వాడికలు దైవారు
చెలిమి సారెఁజేసితే చేతికి లోనౌను
॥ఊర॥
సరసము లాడఁగానే చవులు వెగ్గళమవును
గరిమలఁ బెనఁగితే కళలు నిండు
యిరవై శ్రీవేంకటేశుఁ డింతలోనె నన్నుఁ గూడె
తిరమై వుండితే మోమితేనెకు నోరూరును
॥ఊర॥
AndhraBharati AMdhra bhArati - telugu కీర్తన సాహిత్యము