ఆంధ్రభారతి - తాళ్లపాక అన్నమాచార్య కీర్తనలు - కానీవయ్యా అందుకేమి కాదనేనా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1730-5
సంపుటము: 27-179

తాళ్లపాక అన్నమాచార్య

రాగము: ఆహిరి

కానీవయ్యా అందుకేమి కాదనేనా మోనాన నుండఁగ నిన్ను మోవనాడేనా	॥పల్లవి॥
పొత్తుల మాఁటలలోనే బువ్వమారగించితిరి అత్తి మోవులనే విడే లందుకొంటిరి యెత్తిన చలముతోడ యేల నాతో బొంకేవు కొత్తలుగ వేరే నిన్నుఁ గోపగించేనా	॥కానీ॥
తెలినవ్వు సిగ్గులనే తెరలు వట్టించితివి తలఁబాలు వోసితివి తమకముల చలము సాదించి యేల సారె నానలు వెట్టేవు వెలినుండి వేరే నిన్ను వెంగెమాడేనా	॥కానీ॥
గొప్పకుచముల బూజకుండలునుఁ బట్టితివి పిప్పిఁగాఁగ రతులను పెండ్లాడితివి ఇప్పుడే శ్రీ వేంకటేశ యిట్టె నన్నుఁ గూడితివి నెప్పున నాపెకు నీకు నింద గట్టేనా	॥కానీ॥