Display:
అధ్యాత్మ సంకీర్తన
రేకు: 3-1
సంపుటము: 1-14
తాళ్లపాక అన్నమాచార్య
రాగము: కన్నడగౌళ
గాలినే పోయఁ గలకాలము
తాలిమికిఁ గొంతయుఁ బొద్దు లేదు
॥గాలినే॥
అడుసు చొరనే పట్టె నటునిటుఁ గాళ్ళు
గడుగుకొననే పట్టెఁ గలకాలము
ఒడలికి జీవుని కొడయఁడైన హరిఁ
దడవఁగా గొంతయుఁ బొద్దు లేదు
॥గాలినే॥
కలఁచి చిందనే పట్టెఁ గడవ నించగఁ బట్టె
కలుషదేహపు బాధఁ గలకాలము
తలపోసి తనపాలి దైవమైన హరి
దలఁచఁగా గొంతయుఁ బొద్దు లేదు
॥గాలినే॥
శిరసు ముడువఁ బట్టె చిక్కు దియ్యఁగఁ బట్టె
గరిమలఁ గపటాలఁ గలకాలము
తిరువేంకటగిరిదేవుఁడైన హరి
దరిచేరఁ గొంతయుఁ బొద్దు లేదు
॥గాలినే॥
AndhraBharati AMdhra bhArati - telugu కీర్తన సాహిత్యము