ఆంధ్రభారతి - తాళ్లపాక అన్నమాచార్య కీర్తనలు - సేసవెట్టి పెండ్లాడి సిగ్గులు వడితేఁ బోదు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1854-5
సంపుటము: 28-316

తాళ్లపాక అన్నమాచార్య

రాగము: నాదరామక్రియ

సేసవెట్టి పెండ్లాడి సిగ్గులు వడితేఁ బోదు బాస యిచ్చి నీకితఁడు బత్తి సేసీని	॥పల్లవి॥
మనసిచ్చి యాతనితో మాఁటలాడఁగదవే వినయాన ని న్నతఁడు వేఁడుకొనీని పెనఁగక ప్రియములే పెంచి పెంచి చూపవే మునుకొని చుట్టరికములే సేసీని	॥సేస॥
వేడుకతో నీమోవి విందు లిట్టె పెట్టవే వోడక నీతోపొందు లొనరించీని జాడతోడ వీనులారా సమ్మతించి వినవే వాడికెతో మేనబావ వావులు చెప్పీని	॥సేస॥
యింటలో నీబలమెల్లా నితనికిఁ జూపవే జంటయై నీకాఁ(కాఁగా?) టిలో సాముసేసీని నంటు శ్రీవేంకటేశుఁ డున్నతిఁ గూడె మెచ్చవే పెంటలైన రతులను పెచ్చు వెరిగీని	॥సేస॥