ఆంధ్రభారతి - తాళ్లపాక అన్నమాచార్య కీర్తనలు - ఎంతగాలమొకదా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

సంకీర్తన
తాళ్లపాక వేంకటశేషాచార్యుల
వ్రాతప్రతి పుట: 34 సంకీర్తన: 33
ప్రత్యేక సంపుటము - సంకీర్తన: 46

తాళ్లపాక అన్నమాచార్య

రాగము: లుప్తము

ఎంతగాలమొకదా యీ దేహధారణము చింతాపరంపరలఁ జిక్కువడవలసె	॥పల్లవి॥
వడిగొన్న మోహంబువలలఁ దగులై కదా కడలేని గర్భనరకము లీఁద ^[1]వలసె నడిమి సుఖములచేత ననుపు సేయఁగఁగదా తొడరి హేయపుదిడ్డిఁ దూరాడవలసె	॥ఎంత॥
పాపపుంజములచేఁ బట్టువడఁగాఁగదా ఆపదలతోడి దేహము మోవవలసె చూపులకులోనైనసుఖము గానక ^[2] కదా దీపనభ్రాంతిచేఁ దిరిగాడవలసె	॥ఎంత॥
హితుఁడైన తిరువేంకటేశుఁ గొలువకకదా ప్రతిలేని నరకకూపమునఁ బడవలసె అతని కరుణారసం బబ్బకుండఁగఁగదా బతిమాలి నలుగడలఁ బారాడవలసె	॥ఎంత॥

(ఈ సంకీర్తన 1వ సంపుటంలో 316వ సంకీర్తనగా ఉంది.)

^[1] నరకగర్భమునఁ బడవలసె నిడురేకు 18
^[2] గోరఁగఁగదా?