Display:
సంకీర్తన
తాళ్లపాక వేంకటశేషాచార్యుల
వ్రాతప్రతి పుట: 113 సంకీర్తన: 113
ప్రత్యేక సంపుటము - సంకీర్తన: 176
తాళ్లపాక పెదతిరుమలాచార్య
రాగము: లుప్తము
నేనైతే నీడేరుదు నీకు లీలా మాత్ర మింతే
మానక నన్నేలు కొమ్మి మాధవ గోవిందా
॥పల్లవి॥
నీవు నన్ను మన్నించితే నీ మహిమలోఁ గొంత
యీవల వెలితి యౌనా యీ లోభ మేలా
కావించి పాలజలధికడ నొక్క తుంపురు
వేవేగ విదలించితే వెలితి యెందులకు
॥నేనైతే॥
వెడకర్మినైనా నన్ను వెనక వేసుకొంటేను
గొడవ నీకు వచ్చీనా కొంక నేఁటికి
గడుసుదొంగైనవాఁడొకఁడు కొండలో దాఁగితే
యెడ మిచ్చినకొండకు హీన మయ్యీనా
॥నేనైతే॥
కందువ శ్రీవేంకటేశ కరుణారసము నాపై
చిందరాదా అనుమాన చింత లేఁటికి
యిందరిపై సూర్యుఁడు యెండలు గాసితేను
అందుకొన్ని కిరణాలు అరగిపోయీనా
॥నేనైతే॥

(ఈ సంకీర్తన 15వ సంపుటంలో 22వ సంకీర్తనగా ఉంది.)

AndhraBharati AMdhra bhArati - telugu కీర్తన సాహిత్యము