ఆంధ్రభారతి - తాళ్లపాక అన్నమాచార్య కీర్తనలు - పోఁబొయ్యే పడుచ! - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

సంకీర్తన
తాళ్లపాక వేంకటశేషాచార్యుల
వ్రాతప్రతి పుట: 84 సంకీర్తన: 84
ప్రత్యేక సంపుటము - సంకీర్తన: 200

తాళ్లపాక అన్నమాచార్య

రాగము: ఘంటారవము

పోఁబొయ్యే పడుచ! - వుండవే మాట చెప్పేను పో వోయి వగకాఁడ! నీకు - పొద్దుపోక తిరిగేవు	॥పల్లవి॥
తలమీద తుమ్మెదలున్నవి ద - గ్గర వచ్చిన రేఁచీనే తెలియగ కురులింతె గాని - తేటిగములు కావోయి చలమున పయ్యెదలోపల - జక్కవలనే బెట్టేవే బలిమిగల నా గుబ్బలింతె గాని - పక్షులు గావోయి	॥పోఁబొయ్యే॥
పదనైన నీ యధరాన దొండ - పండున్నది నాకియ్యవే పెదవింతే కాని నా - యధరానను బింబఫలము గాదోయి వదరకువే నీ మేను కుందనము - బంగారొరసి నే జూచేనే పొదలిన నా మేనింతె కాని - పుత్తడి గాదోయి	॥పోఁబొయ్యే॥
నిచ్చలమగు నీ చెక్కుటద్దముల - నీడలు నే జూచేనే మెచ్చుగ నా చెక్కులింతే గాని - మెఱుగుబిళ్లలు గావోయి అచ్చుగ శ్రీవేంకటనాథుడనై - అతివ నిన్ను గూడితిని ముచ్చట దీరెను మొగి నిల - మ్రొక్కే నీకు పోవోయి	॥పోఁబొయ్యే॥