[1](మదిలో మెదలెడి పతికిని - యెదలో నొదిగిన సతివై ముద మొందుచు కలికీ! స-మ్మోదము గూర్తువుగా)	॥పల్లవి॥[2]
చలమున నేరాయని యర - జారిన పయ్యెదతోడను తొలఁగక యెదపై నొరగుచుఁ - దుందుడు కారఁగను చిలుకకు బింబము నిచ్చే - చెలుపున నీ యధరమ్మును తలఁపునఁ దమిఁ [3]జనులొత్తుచు - దయతో నిత్తువుగా	॥మదిలో॥
కొసరినను నేరా యని - కూరిమి దైవారగను ముసిముసి నగవుల వెన్నెల - మోమునఁ గాయఁగను వొసపరి కోయిలకును చిగు- రొసగిన వడి దోపగను పసగల వీడెపు మడుపులు - పైకొని యిత్తువుగా	॥మదిలో॥
చనవున వెంకటపతి కను - [4]చెనకిన నేరా యనినను మనమున మచ్చిక బాగులు - మమతల విరిగొనగా గొనబౌ [5]జక్కవ పిట్టకు - కోరిక [6]నకరువు లిడు క్రియ ననవిల్తుని [7]కజ్జాయము - నయమున నిత్తువుగా	॥మదిలో॥

---

^[1] బ్రాకెట్లలోని అంశములు వ్రాతప్రతిలో లుప్తములు
^[2] లుప్తము
^[3] తమి ససు లొత్తుచు (వ్రాతప్రతి)
^[4] కనుచెకిన (వ్రాతప్రతి)
^[5] పొజ్జక్కన పిట్ట (వ్రాతప్రతి)
^[6] నకరవువిడు (వ్రాతప్రతి)
^[7] కెంజాయము (వ్రాతప్రతి)