Display:
అధ్యాత్మ సంకీర్తన
రేకు: 288-3
సంపుటము: 3-508
తాళ్లపాక అన్నమాచార్య
రాగము: దేవగాంధారి
ఏమని నుతింతు నేను యిందిరానాయక నీవు
కామించి కోరినవారి కల్పలతవు
॥పల్లవి॥
నెట్టనఁ దలఁచేవారి నిండు నిధానమవు
పట్టినవారి చేతి బంగారమవు
చుట్టరికమెంచేవారి చోటికిఁ దల్లిదండ్రివి
ముట్టి కొలిచినవారి ముంజీతమవు
॥ఏమ॥
సేవ చేసినవారికి చేతిలో మాణికమవు
భావించువారికి పరబ్రహ్మమవు
కావలెనన్నవారికి ఘన మనోరథమవు
వావిరిఁ బూజించువారి వజ్రపంజరమవు
॥ఏమ॥
బత్తి సేసినవారికి భవరోగ వైద్యుఁడవు
హత్తి నుతించినవారి యానందమవు
పొత్తుల‌ అలమేల్మంగ బువ్వపు శ్రీవేంకటేశ
ఇత్తల మా పాలిటికి నిహపరదాతవు
॥ఏమ॥
AndhraBharati AMdhra bhArati - telugu కీర్తన సాహిత్యము