Display:
అధ్యాత్మ సంకీర్తన
రేకు: 331-1
సంపుటము: 4-178
తాళ్లపాక అన్నమాచార్య
రాగము: ఆందోళి
కన్నులపండుగలాయఁ గన్నవారి కిందరికి
వెన్నుఁ డేఁగీ నిల్లిదివో వీధుల వీధులను
॥పల్లవి॥
అదె యెక్కెఁ దిరుతేరు అసురలు బెదరఁగ
త్రిదశులు చెలఁగఁగ దేవదేవుఁడు
కదలె బండికండ్లు ఘనమైన మ్రోఁతతోడ
వెదచల్లుఁ గాంతులతో వీధుల వీధులను
॥కన్ను॥
తోలి యాడీఁ దిరుతేరు దుష్టులెల్ల నణఁగఁగ
చాలుకొని శిష్టులెల్ల జయవెట్టఁగ
గాలికిఁ బడగలెల్లాఁ గడు నల్లాడఁగఁ జొచ్చె
వేలేటి పువుదండలతో వీధుల వీధులను
॥కన్ను॥
తావు చేరెఁ దిరుతేరు ధర్మములు నిలువఁగ
యీవల నలమేల్మంగ ఇచ్చగించఁగా
శ్రీవేంకటేశ్వరుఁడు శింగారాలు మెరసెను
వేవేలు విధముల వీధుల వీధులను
॥కన్ను॥
AndhraBharati AMdhra bhArati - telugu కీర్తన సాహిత్యము