ఆంధ్రభారతి - తాళ్లపాక అన్నమాచార్య కీర్తనలు - ఏఁటికి విచ్చేసితివో యెట్టుదెలుసు మాతో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 2-2
సంపుటము: 5-7

తాళ్లపాక అన్నమాచార్య

రాగము: ముఖారి

ఏఁటికి విచ్చేసితివో యెట్టుదెలుసు మాతో మాటలాడఁగా నీకు మాటవచ్చీఁ జుమ్మీ	॥పల్లవి॥
అప్పన గొంటివో లేదొ ఆకెచేత నేఁడైనా ఇప్పుడే మాయింటిదాఁక నేఁగేనంటా యిప్పటి యీతమకాన యింతలోని పనికిఁగా చెప్పక వచ్చిననాకె చేరనీదు సుమ్మీ	॥ఏటి॥
అనుచరించితో లేదో ఆకెనో ముందరనైనా వెనక నాతోడ నవ్వేవు గాని ఘనుఁడు వూరకే నన్నుఁ గదిసేవు కడుఁబై- కొనఁగ నాకె విన్న కోపగించుఁ జుమ్మీ	॥ఏటి॥
ఆరగించితో లేదో ఆకెపొత్తుననే యింత గారవము లేక మోము కళదేరదు చేరి కూడితివి నన్ను శ్రీ వేంకటేశుఁడ యింత- యీరసాన నాకె విన్న యేమనునో సుమ్మీ	॥ఏటి॥