ఆంధ్రభారతి - తాళ్లపాక అన్నమాచార్య కీర్తనలు - ఎంత మన్నించితో యీ యింతినిదె నీవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 95-3
సంపుటము: 5-380

తాళ్లపాక అన్నమాచార్య

రాగము: ఆహిరి

ఎంత మన్నించితో యీ యింతినిదె నీవు అంతకంతకుఁ బ్రేమ నలరీనిపుడు	॥పల్లవి॥
పడఁతి నాట్యశ్రాంతిఁ బవళించి తొల్లి నీ - తొడలపై నీవు తల దువ్వఁగాను కడలేని యటువంటి కళలు దలఁచే కదా విడువని వియోగమున వేఁగీనిపుడు	॥ఎంత॥
ఒనరఁ గుచభారమున నొరఁగి యీ మలఁగుపై- నెనసి నీవాకు మడిచియ్యఁగాను వనిత నేఁడటువంటి వలపుదలఁచే కదా ఘనమైన తాపమునఁ గాఁగీనిపుడు	॥ఎంత॥
సిరులు నీ మోముపైఁ జెక్కు లొయ్యన చేర్చి యరమోడ్చి కనురెప్పలలమి యలమి తిరువేంకటాచలాధిపుఁడ నినుఁ గూడియే పరవశానంద సంపదఁ దేలెనిపుడు	॥ఎంత॥