ఆంధ్రభారతి - తాళ్లపాక అన్నమాచార్య కీర్తనలు - ఎంత చెప్పినా మాన దిందాఁక నే మెల్ల - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 336-6
సంపుటము: 11-216

తాళ్లపాక అన్నమాచార్య

రాగము: ఆహిరి

ఎంత చెప్పినా మాన దిందాఁక నే మెల్ల పంతపు దమ కోపాలు పచరించఁ బట్టెను	॥పల్లవి॥
ఆలవట్టము గాలికి అంగన పయ్యద జారి పాలిండ్లు గాన రాఁగాఁ బతిఁ గాఁగిలించెను మేలు మేలు దీని నేఁడు మెచ్చవలె నిందుకే వోలి నూరకున్నవారి నొక్కటిగాఁ జేసెఁగా	॥ఎంత॥
కప్పురము నోటి కీఁగా కాంత చలిగొని పతి కప్పినపచ్చడమే కప్పుకొనెను కుప్పలుగా దీనినె కొనియాడవలె నేఁడు తప్పక చూడనివారిఁ దగులుగాఁ జేసెను	॥ఎంత॥
పన్నీరు చల్లఁగాను పడఁతిమై పులకించి తన్నుఁ దానె సిగ్గుపడి తల వంచి నవ్వెను అన్నిటా మొక్కఁగ వలె నందుకే నేఁడు దీనికి యెన్నఁగ శ్రీవెంకటేశు నింతినిఁ గూడించెను	॥ఎంత॥