ఆంధ్రభారతి - తాళ్లపాక అన్నమాచార్య కీర్తనలు - మంగళము గోవిందునకు జయమంగళము గరుడధ్వజునకును - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 7-5
సంపుటము: 1-46

తాళ్లపాక అన్నమాచార్య

రాగము: లలిత

మంగళము గోవిందునకు జయమంగళము గరుడధ్వజునకును మంగళము సర్వాత్మకునకు ధర్మస్వరూపునకూ, జయజయ	॥మంగళము॥
ఆదికిని నాదైన దేవున కచ్యుతున కంభోజనాభున- కాదికూర్మంబైన జగదాధారమూర్తికిని వేదరక్షకునకును సంతతవేదమార్గవిహారునకు బలి- భేదికిని సామాదిగానప్రియవిహారునకు	॥మంగళము॥
హరికిఁ బరమేశ్వరునకును శ్రీధరునకును గాలాంతకునకును పరమపురుషోత్తమునకును బహుబంధదూరునకు సురమునిస్తోత్రునకు దేవాసురగణశ్రేష్ఠునకు కరుణా- కరునకునుఁ గాత్యాయనీనుతకలితనామునకు	॥మంగళము॥
పంకజాసనవరదునకు భవపంకవిచ్ఛేదునకు భవునకు శంకరున కవ్యక్తునకు నాశ్చర్యరూపునకు వేంకటాచలవల్లభునకును విశ్వమూర్తికి నీశ్వరునకును పంకజాకుచకుంభకుంకుమపంకలోలునకు	॥మంగళము॥