Display:
అధ్యాత్మ సంకీర్తన
రేకు: 8-2
సంపుటము: 1-50
తాళ్లపాక అన్నమాచార్య
రాగము: ఆహిరి
జీవాతుమై యుండు చిలుకా నీ-
వావలికి [1]పరమాత్ముఁడై యుండు చిలుకా
॥జీవాతుమై॥
ఆతుమపంజరములోన నయముననుండి నాచేతనే పెరిగిన చిలుకా
జాతిగాఁ గర్మపుసంకెళ్ళఁ బడి కాలఁ జేతఁ బేదైతివే చిలుకా
భాతిగాఁ జదువులు పగలు రేలును నా చేత నేరిచినట్టి చిలుకా
రీతిగా దేహంపు రెక్కలచాటున నుండి సీతుకోరువలేని చిలుకా
॥జీవాతుమై॥
బెదరి [2]అయిదుగురికిని భీతిఁబొందుచుఁ గడుఁ [3]జెదరఁగఁ జూతువే చిలుకా
అదయు[4]లయ్యిన శత్రులారుగురికిఁ గాక అడిచిపడుదువే నీవు చిలుకా
వదల కిటు [5]యాహారవాంఛ నటు పదివేలు వదరులు వదరేటి చిలుకా
తుదలేని మమతలు తోరమ్ము సేసి నాతోఁగూడి మెలగిన చిలుకా
॥జీవాతుమై॥
నీవన నెవ్వరు నేనన నెవ్వరు నీవే నేనై యుందుఁ జిలుకా
శ్రీవేంకటాద్రిపై చిత్తములో నుండి సేవించు[6]కొని గట్టి చిలుకా
దైవమానుషములు తలఁపించి యెపుడు నా తలఁపునఁ బాయని చిలుకా
యేవియును నిజము గావివి యేఁటికని నాకు నెఱిఁగించినటువంటి చిలుకా[7]
॥జీవాతుమై॥

[1] ‘వావలికిఁ బర’అని పూ.ము.పా.

[2] ‘యైదుగురికిని’ అని పూ.ము.పా.

[3] ‘జెదరంగ’ అని పూ.ము.పా.

[4] ‘లైన’ పూ.ము.పా.

[5] ‘లాహార’ అని పూ.ము.పా.

[6] ‘కొను’ లేక ‘కొనునట్టి’ కావచ్చు.

[7] ఇది పెద్దపాట. దీనిలో ప్రతిచరణము రెండుపంక్తుల కొకపాదముగ గుర్తింపవలెను. తొలిచరణము నాలుగుపంక్తులకే ‘జీవా’ అను పల్లవి గ్రహణము పొరపాటుగ పడినది.
AndhraBharati AMdhra bhArati - telugu కీర్తన సాహిత్యము