Display:
శృంగార సంకీర్తన
రేకు: 514-6
సంపుటము: 13-82
తాళ్లపాక అన్నమాచార్య
రాగము: దేవగాంధారి
ఏడేడఁ జూచినాను యీ సుద్దులే
కోడెకాఁడవయితివి గోవిందరాజా
॥పల్లవి॥
అందగారి మాటలాడి ఆయములంటి యంటి
యిందుముఖిఁ జొక్కించి యేలుకొంటివి
పొందులు మరిగి యాకెభోగములకొఱకుఁ గా
గొందిఁ బవ్వళించితివి గోవిందరాజా
॥ఏడే॥
సెలవి నవ్వులు నవ్వి చేతులు చాఁచి చాఁచి
కలికిని వలపించి కై కొంటివి
కలయికలకుఁగానే కందువ పానుపుమీఁదఁ
గొలువున్నాఁడ విదివో గోవిందరాజా
॥ఏడే॥
తమ్ములము నోర నించి తమకము రేఁచి రేఁచి
కొమ్మనుఁ గాఁగిటిలోనఁ గూడితివి
నెమ్మది శ్రీవేంకటేశ నెలఁతరతులకే
కుమ్మరించేవు మోహము గోవిందరాజా
॥ఏడే॥
AndhraBharati AMdhra bhArati - telugu కీర్తన సాహిత్యము