ఆంధ్రభారతి - తాళ్లపాక అన్నమాచార్య కీర్తనలు - నీతోఁ బెనఁగదు నిన్ను నౌఁగాదనదు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 612-6
సంపుటము: 14-72

తాళ్లపాక అన్నమాచార్య

రాగము: ఆహిరి

నీతోఁ బెనఁగదు నిన్ను నౌఁగాదనదు నీ తలఁపు దెలియక నిట్టూర్పు వుచ్చీని	॥పల్లవి॥
పక్కన నీవాపెను పయ్యదకొంగు వట్టితే చెక్కునఁ జెయి వెట్టుక సిగ్గుపడీని చక్కఁగా నప్పటి గోరు చన్నులపై నూఁదితేను నెక్కొన్న వేడుకతోడ నివ్వెరగందీని	॥నీతో॥
తొడిఁబడ నీవాపెను తొడపైకిఁ దీసుకొంటే చిడుముడి మేనెల్లాఁ జెమరించీని తడఁబడి యట్టె మోము తప్పక చూచితేను పొడలుగాఁ జెక్కులెల్లాఁ బులకించీని	॥నీతో॥
సారె సారె నీవాపెతో సరసములాడఁగాను గారబాన నిన్నందుకుఁ గాఁగిలించీని యీ రీతి శ్రీ వేంకటేశ యింతి నిట్టె కూడితివి నీ నేరుపులెల్లా మించ నిన్ను మెచ్చీని	॥నీతో॥