పదిలము కోట పగవారు అదనఁ గాచుకొందు రాఱుగురు	॥పదిలము॥
ఇమ్మైఁ జెప్ప యిందరిచేత తొమ్మిదినెల్లఁ దోఁగినది కొమ్మతీరునఁ గుదురైన కోట దొమ్మికాండ్లైదుగురుందురు	॥పదిలము॥
వొంటికాఁడు రాజు వుడుగక తమలోన [1]వొంటనీని మంత్రులొక యిద్దరు దంటతనంబునఁ దమ యిచ్చఁ దిరిగాడు బంటు లేడుగురు బలవంతులు	॥పదిలము॥
కలవు తొమ్మిది [2]కనుమల తంత్రము నిలుపఁగలిగినట్టి నెరవాదులు తెలిసి కోనేటి తిమ్మినాయఁడు చొచ్చె బలిసె యీ కోట భయమేల	॥పదిలము॥

---

^[1] ‘ఒంటని నీ మంత్రు’ అని పూ.ము.పా.

^[2] ‘కనుమలు’ తంత్రము కావచ్చునేమో? నెరవాదులు కనుమలకు విశేషణము?