Display:
శృంగార సంకీర్తన
రేకు: 746-5
సంపుటము: 16-269
తాళ్లపాక అన్నమాచార్య
రాగము: వరాళి
అడుగు వెట్టితే నీ కాపె మీఁదాన
తొడికి కొంగు వట్టితే తోసిపోవఁ జెల్లునా
॥పల్లవి॥
నిద్దిరించేవేళ వచ్చి నీవు లేపఁగాఁ జెలి
గద్దించి తిట్లు తిట్టి కసరెఁ గాక
కొద్దెరిఁగి నీ వుండితే కోపగించునా యాపె
అద్దో నీ వింతలోనె మా రలుగఁగఁ జెల్లునా
॥అడు॥
చదురంగ మాడేవేళ జాణతనా లాడఁగాను
తుది నిన్నుఁజేతఁ బట్టి తోసెఁ గాక
యెదుటనె వోరిచితే నింత సేసునా యాపె
కదిసి నీ విందుకుఁగాఁ గాంతాళించఁ జెల్లునా
॥అడు॥
పాటలు వాడేటివేళ పైకొని కాఁగిలించఁగ
తాటించి తా కొనగోరు దాఁకించెఁ గాక
యీటున శ్రీ వేంకటేశ యిందు కిట్టె కూడితివి
చీటికిమాటికి నీకు సిగ్గువడఁ జెల్లునా
॥అడు॥
AndhraBharati AMdhra bhArati - telugu కీర్తన సాహిత్యము