Display:
అధ్యాత్మ సంకీర్తన
రేకు: 12-5
సంపుటము: 1-76
తాళ్లపాక అన్నమాచార్య
రాగము: దేసాక్షి[1]
ఎంతైన దొలఁగవై తేదైన నామతికి
వింతచవి సేతుగా విషయబుద్ధి
॥ఎంతైన॥
ఎనసి జన్మముల నే నెట్ల నుండినఁ బోక
వెనకఁ దిరుగుదువు[2]గా విషయబుద్ధి
అనువైన యనుభవన లనుభవించఁగఁ జేసి[3]
వెనక మఱపింతుగా విషయబుద్ధి
॥ఎంతైన॥
కెఱలి కాంతలు[4] నేనుఁ గినిసిననుఁ బొలయలుక
విఱిచి కలపుదువుగా విషయబుద్ధి
తఱితోడ వావివర్తన దలంచిన నన్ను
వెఱపు దెలుపుదువుగా విషయబుద్ధి
॥ఎంతైన॥
యెడలేని యాపదల నెట్లు బొరలిన నన్ను
విడిచిపోవైతిగా విషయబుద్ధి
సడిఁబెట్టి వేంకటస్వామికృపచే నిన్ను
విడిపించవలసెఁగా విషయబుద్ధి
॥ఎంతైన॥

[1] నిడురేకు 34- ధన్నాసి.

[2] నిడురేకు 34- దిరిగితిని.

[3] నిడురేకు 34- నించిన నన్ను.

[4] నిడురేకు 4- కాంతల.
AndhraBharati AMdhra bhArati - telugu కీర్తన సాహిత్యము