ఆంధ్రభారతి - తాళ్లపాక అన్నమాచార్య కీర్తనలు - నాయందుఁ గడమలేదు నమ్మించినవాఁడవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1086-1
సంపుటము: 20-511

తాళ్లపాక అన్నమాచార్య

రాగము: శ్రీరాగం

నాయందుఁ గడమలేదు నమ్మించినవాఁడవు చెయిమీఁదుగా నెట్టుసేసినా నీచిత్తము	॥పల్లవి॥
మొక్కలాన నే నిన్ను ముంచి యాడినమాఁటకు మొక్కితిఁ బంతమిచ్చితి ముందుముందుగా కక్కసించనోప దయగలిగినప్పుడు నీవే మక్కువసేసి నన్ను మన్నింతువుగాక	॥నాయం॥
చలవట్టి నే నిన్ను జంకించినయందుకు చెలఁగి నవ్వు నవ్వితి సెలవుగాను బలిమిశాయఁగనోప బత్తిగలప్పుడే నీవే పిలిచి కాఁగిట నించి పెనఁగేవుగాని	॥నాయం॥
ఆసపడి నిన్నుఁ గూడి అలయించినయందుకు వాసితో మోవి యిచ్చితి వన్నెలుగాను యీసుదీరె శ్రీవేంకటేశ నన్నుఁ గూడితివి రాసికెక్క నింకా నీవే రక్షించేవు గాని	॥నాయం॥