Display:
శృంగార సంకీర్తన
రేకు: 1086-3
సంపుటము: 20-513
తాళ్లపాక అన్నమాచార్య
రాగము: దేశి
ఏమైనా నను యెదురాడ నేను
దీమసంబుతోఁ దెలిసితి నేను
॥పల్లవి॥
యెక్కుడుమాట నే నేమనియాడిన
వెక్కసురాలని విసుగుదువు
మొక్కుచు నీపాదములు చూచుక ఇటు
వొక్కట నూరకయుండెద నేను
॥ఏమై॥
పంతంబున నేఁ బైకొని నవ్విన
అంతరట్టడని యాడుదువు
చెంత నూడిగము సేసుక నీకిట్టె
చింతదీరి కడుచెలగెద నేను
॥ఏమై॥
ఆలమి నిన్ను రతి నలయించినను
బలిమితోడిదని పలుకుదువు
యెలమిని శ్రీవేంకటేశ్వర కూడితి
మెలగినట్లనే మెచ్చెద నేను
॥ఏమై॥
AndhraBharati AMdhra bhArati - telugu కీర్తన సాహిత్యము