Display:
శృంగార సంకీర్తన
రేకు: 1129-4
సంపుటము: 21-167
తాళ్లపాక అన్నమాచార్య
రాగము: దేసాళం
కోరి ని న్నిదెఱఁగక కోపగించుకొంటిఁ గాక
నేరుపెంత లేకుండితే నీవు నన్నంటుదువా
॥పల్లవి॥
అంది వాదులకు రావు ఆఱడిఁబెట్టుకొనవు
యెందుకైనా నౌదువు ఇది మేలయ్యా
అందగాఁడ విటువంటిఆతఁడవుగాకుండితే
చెంది మున్ను సేసినట్టిచేఁతలెల్లఁ జెల్లునా
॥కోరి॥
వోపనన వేమిటికి వొద్ద నెవ్వరుండినాను
యేపనైనాఁ జేసేవు ఇది మేలయ్య
వైపరివి ఇటువంటివాఁడవు గాకుండితేను
రాపుల నిన్నిందరును రసికుఁడవందురా
॥కోరి॥
వట్టిసిగ్గులు వడవు వాసులెంచవు నాయెడ
యిట్టె కాఁగిటఁ గూడితి విది మేలయ్య
ముట్టి శ్రీవేంకటేశుఁడ మోహ మింత లేకుండితే
జట్టిగొని నీమేలు సతులెల్ల మెత్తురా
॥కోరి॥
AndhraBharati AMdhra bhArati - telugu కీర్తన సాహిత్యము