ఆంధ్రభారతి - తాళ్లపాక అన్నమాచార్య కీర్తనలు - ఏది తుద దీనికేది మొదలు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 17-2
సంపుటము: 1-102

తాళ్లపాక అన్నమాచార్య

రాగము: బౌళి

ఏది తుద దీనికేది మొదలు పాదుకొను హరి మాయఁ బరగు జీవునికి	॥ఏది॥
ఎన్ని బాధలు దనకు నెన్ని లంపటములు యెన్ని వేదనలు మరి యెన్ని దుఃఖములు యెన్ని పరితాపంబు లెన్ని దలపోఁతలు యెన్ని చూచిన మరియు నెన్నైనఁ గలవు	॥ఏది॥
యెన్ని కొలువులు దనకు నెన్ని యనుచరణలు యెన్ని యాసలు మరియు నెన్ని మోహములు యెన్ని గర్వములు దనకెన్ని దైన్యంబులివి ఇన్నియునుఁ దలఁప మరి యెన్నైనఁ గలవు	॥ఏది॥
యెన్నిటికిఁ జింతించు నెన్నిటికి ^[1]హర్షించు నెన్నిటికి నాసించు నెన్నిటికిఁ దిరుగు యిన్నియును దిరువేంకటేశు లీలలు గాఁగ నెన్ని చూచినను దా నెవ్వఁడును గాఁడు	॥ఏది॥

^[1] ‘హరుషించు’ రేకు.