ఆంధ్రభారతి - తాళ్లపాక అన్నమాచార్య కీర్తనలు - ఎక్కడ చూచిన వీరే యింటింటి ముంగిటను - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 201-4
సంపుటము: 3-4

తాళ్లపాక అన్నమాచార్య

రాగము: దేసాళం

ఎక్కడ చూచిన వీరే యింటింటి ముంగిటను పెక్కుచేఁతలు సేసేరు పిలువరే బాలుల	॥పల్లవి॥
పిన్నవాఁడు కృష్ణుడు పెద్దవాడు రాముఁడు వన్నె నిద్దరమడలవలె నున్నారు వెన్నలు దొంగిలుదురు వీఁడు వాఁడు నొక్కటే పన్నుగడై వచ్చినారు పట్టరే యీ బాలుల	॥ఎక్క॥
నల్లనివాఁడు కృష్ణుడు తెల్లనివాఁడు రాముఁడు అల్లదివో జోడుకోడెలై వున్నారు వెల్లవిరై తిరిగేరు వేరు లే దిద్దరికిని పెల్లుగ యశోదవద్దఁ బెట్టరె యీబాలుల	॥ఎక్క॥
రోలఁ జిక్కె నొకఁడు రోకలి వట్టె నొకఁడు పోలిక సరిబేసికిఁ బొంచి వున్నారు మేలిమి శ్రీవేంకటాద్రి మించిరి తానే తానై ఆలించి నె(యె?)వ్వరి నేమి ననకురే బాలుల	॥ఎక్క॥