Display:
అధ్యాత్మ సంకీర్తన
రేకు: 17-4
సంపుటము: 1-104
తాళ్లపాక అన్నమాచార్య
రాగము: బౌళి
ఎట్టుచేసినఁ జేసె నేమి సేయఁగవచ్చు
చుట్టపు విరోధంబు సూనాస్త్రుచెలిమి
॥ఎట్టు॥
ఒడలిలోపలి రోగ మొనరఁ బరితాపంబు
కడుపులోపలి పుండు కడలేని యాస
తడిపాఁత మెడగోఁత తలఁపు విషయాసక్తి
గుడిమీఁది తరువు ఆలకులము (ఆలుగులము?) ప్రాణులకు
॥ఎట్టు॥
నీడలోపల [1]యెండ నెలకొన్న బంధంబు
గోడపై సున్నంబు కొదలేని యెఱుక
పాడూరిలో బ్రదుకు పాపకర్మపు బుద్ధి
తాడుపై తపసు తమ ధనము ప్రాణులకు
॥ఎట్టు॥
మంటఁ జేసిన బొమ్మ మనికి సంసారంబు
రెంటికినిగాని వీరిడి కొలువు బ్రదుకు
యింటివేలుపు వేంకటేశుఁ గొలువక పరుల
వెంటఁ దిరుగుట వోడ [2]విడిచి [3]వదరిడుట
॥ఎట్టు॥

[1] ‘యండ’ రేకు.

[2] ‘నిడిచి’ రేకు.

[3] వదరు = సొరకాయ.
AndhraBharati AMdhra bhArati - telugu కీర్తన సాహిత్యము