ఆంధ్రభారతి - తాళ్లపాక అన్నమాచార్య కీర్తనలు - ఎక్కడి నరకములు యెక్కడి మృత్యువు మాకు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 202-6
సంపుటము: 3-12

తాళ్లపాక అన్నమాచార్య

రాగము: సాళంగనాట

ఎక్కడి నరకములు యెక్కడి మృత్యువు మాకు దక్కి నీ దివ్యనామామృతము చూరగొంటిమి	॥పల్లవి॥
తమితో శ్రీపతి నీ దాసులఁ జేరినప్పుడే యమకింకర భయము లణఁగిపోయ జమళి నీ యాయుధలాంఛనము మోచినప్పుడే అమరఁ గాలదండము లవియెల్లఁ బొలిసె	॥ఎక్క॥
మును నీ నగరిత్రోవ మొగమైన యప్పుడే ఘనయామ్య మార్గము గట్టు వడియ వొనర నీ తిరుపతి నొకరాత్రి వున్నపుడే కనలు కాలసూత్రాది ఘాతలెల్లఁ బూడె	॥ఎక్క॥
యెడరై నీ మంత్రజప మెంచుకొన్న యపుడే కడుఁ జిత్రగుప్తుని లెక్కలు గడచె వడిగా శ్రీవేంకటేశ్వర మీ శరణనఁగా అడరి వైకుంఠము మాయరచేత నిలిచె	॥ఎక్క॥