ఆంధ్రభారతి - తాళ్లపాక అన్నమాచార్య కీర్తనలు - భావించి నేరనైతి పశుబుద్ధినైతిని - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 204-2
సంపుటము: 3-20

తాళ్లపాక అన్నమాచార్య

రాగము: గుజ్జరి

భావించి నేరనైతి పశుబుద్ధినైతిని యీవల నా యపచార మిది గావవయ్యా	॥పల్లవి॥
హరి నీవు ప్రపంచమందుఁ బుట్టించితి మమ్ము పరము నే సాధించేది బలుద్రోహమవుఁ గాదో సిరుల నేలేటివాఁడు చెప్పినట్టు సేయక విరసాలు బంట్లకు వేరే సేయఁ దగునా	॥భావిం॥
పంచేంద్రియములు నాపైఁ బంపువెట్టితివి నీవు యెంచి వాని నే దండించేదిది నేరమౌఁ గాదో పెంచేటి తల్లిదండ్రులు ప్రియమై వడ్డించఁగాను కంచము కాలఁ దన్న సంగతి యాబిడ్డలకు	॥భావిం॥
మిక్కిలి సంసారము మెడఁగట్టితివి నాకు అక్కర నే వేసారేది అపరాధమవుఁ గాదో దిక్కుల శ్రీవేంకటాద్రి దేవుఁడ నీవియ్యఁగాను యెక్కడో జీవుఁడ నేను యెదురాడఁ దగునా	॥భావిం॥