Display:
అధ్యాత్మ సంకీర్తన
రేకు: 17-6
సంపుటము: 1-106
తాళ్లపాక అన్నమాచార్య
రాగము: లలిత
ఎక్కడి దురవస్థ లేఁటిదేహము లోనఁ
జిక్కి జీవుఁడు [1]మోక్షసిరిఁ జెందలేఁడు
॥ఎక్కడి॥
ఒడలు మాంసపూర మొక పూఁటయిన మీఁదు
గడుగకున్నఁ గొరగాదు
కడలేని మలమూత్రగర్హిత[2] మిది, లోను
గడుగరాదు యెంత గడిగినఁ బోదు
॥ఎక్కడి॥
అలర చిత్తము చూడ నతిచంచలము దీనఁ
గలసిన పెనుగాలి గనము
మెలుపులేని చిచ్చు మీఁద[3]మిక్కిలిఁ గొంత
నిలుపు లేదు పట్టి నిలుపఁగరాదు
॥ఎక్కడి॥
తిరువేంకటాచలాధిపుఁడు నిత్యానంద-
కరుఁడు జీవునకు రక్షకుఁడు
కరుణించి యొకవేళఁ గాచినఁ గాని మేను
చొరక మానెడు బుద్ధి చోఁక దెవ్వరికి
॥ఎక్కడి॥

[1] ఇది విరుద్ధసమాసము. ఇట్టి చిల్లరదోషముల ఈ వాఙ్మయమున పట్టింపు లేదు.

[2] ‘గరిహిత’ రేకు.

[3] ‘మీఁదు’ కావచ్చు.
AndhraBharati AMdhra bhArati - telugu కీర్తన సాహిత్యము