ఆంధ్రభారతి - తాళ్లపాక అన్నమాచార్య కీర్తనలు - దైవమ నీవే యిఁక దరి చేరుతువుఁ గాక - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 206-2
సంపుటము: 3-32

తాళ్లపాక అన్నమాచార్య

రాగము: దేవగాంధారి

దైవమ నీవే యిఁక దరి చేరుతువుఁ గాక జీవుల వసము గాదు చిక్కిరి లోలోననే	॥పల్లవి॥
పుట్టుట సహజ మిది పొదలే జీవుల కెల్ల గట్టిగా జగమునందు కలకాలము నట్టేటి వరదవలె నానాటి నీ మాయ కొట్టుక పారఁగఁజొచ్చె కూడిన విజ్ఞానము	॥దైవ॥
పాపమే సహజము బద్ధసంసారుల కెల్ల కాఁపురపు విధులలో కలకాలము తేపలేని సముద్రము తెరఁగున కర్మమెల్లా మాపురేపు ముంచఁజొచ్చె మతిలోని ధైర్యము	॥దైవ॥
లంపటమే సహజము లలి దేహధారులకు గంపమోపుకోరికెల కలకాలము యింపుల శ్రీవేంకటేశ ఇదె నీ దాసులని పంపుసేసి బ్రదికించె ప్రపన్నసుగతి	॥దైవ॥