ఆంధ్రభారతి - తాళ్లపాక అన్నమాచార్య కీర్తనలు - చాలదా మా జన్మము నీ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 18-4
సంపుటము: 1-110

తాళ్లపాక అన్నమాచార్య

రాగము: సామంతం

చాలదా మా జన్మము నీ పాలింటివారమై బ్రతుకఁగఁ గలిగె	॥చాలదా॥
కమలాసనాదులు గానని నీపై మమకారము సేయ మార్గము గలిగె అమరేంద్రాదుల కందరాని నీ కొమరైన నామము కొనియాడఁ గలిగె	॥చాలదా॥
సనకాదులును గానఁజాలని నిన్నుఁ తనివోవ మతిలోనఁ దలపోయఁ గలిగె ఘనమునీంద్రులకు నగమ్యమైవున్న నిను సంతతమును వర్ణింపఁగలిగె	॥చాలదా॥
పరమమై ^[1]భవ్యమై పరిగిన నీ యిరవిట్టిదని మాకు నెఱుఁగంగఁ గలిగె తిరువేంకటాచలాధిప నిన్ను యీ ధరమీఁదఁ బలుమారు దరిసింపఁ గలిగె	॥చాలదా॥

^[1] ‘దివ్యమై’ అని పూ.ము.పా.