ఆంధ్రభారతి - తాళ్లపాక అన్నమాచార్య కీర్తనలు - కన్నవిన్నవారెల్లా కాకు సేయరా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 217-1
సంపుటము: 3-90

తాళ్లపాక అన్నమాచార్య

రాగము: దేసాక్షి

కన్నవిన్నవారెల్లా కాకు సేయరా వున్నతుఁడవైన నీకీ వొచ్చములేలయ్యా	॥పల్లవి॥
దేవతలఁ గాచినట్టి దేవుఁడ నీకుఁ బసుల నీవలఁ గాచితివనే హీనమేలా కావించి పాలజలధిఁ గాఁపురముండినయట్టి- నీవు పాలదొంగవనే నింద నీకేలయ్యా	॥కన్న॥
కాలమందు బలి దైత్యుఁ గట్టివేసినట్టి నీకు రోలఁ గట్టువడినట్టి రోఁత నీ కేల పోలించి లోకాలకెల్ల పొడవైన దేవుఁడవు బాలుఁడవై రేపల్లెలోఁ బారాడనేలయ్యా	॥కన్న॥
పాముమీఁదఁ బవ్వళించి పాయకుండినట్టి నీకు పాముతల దొక్కినట్టి పగలేలా కామించి శ్రీవేంకటాద్రి కడపరాయఁడ నీవు భూమి మాయలణఁచి నేర్పుల మాయలేలయ్యా	॥కన్న॥