ఎన్నాళ్ళదాఁకఁ దా నిట్టె వుండుట బుద్ధి కన్న పోవుట పూర్వకర్మశేషం[1]	॥ఎన్నాళ్ళ॥
కలకాలమెల్ల దుఃఖమె కాఁగఁ బ్రాణికిని వలదా సుఖము గొంతవడియైనను కలుషబుద్ధులఁ [2]బ్రజ్ఞగల దింతయును మంటఁ గలసిపోవుటే పూర్వకర్మశేషం	॥ఎన్నాళ్ళ॥
జాలి తొల్లియుఁ బడ్డ జాలె నేఁడునుఁ గాక మేలు వొద్దా యేమిటినైనాను[3] తాలిమి లోహరిఁ దలఁచక యెఱుకెల్ల గాలిఁ బోవుట పూర్వకర్మశేషం	॥ఎన్నాళ్ళ॥
తరగని నరకబాధయు నేఁడును గాక దరి చేరవలదా యింతటనైనను తిరువేంకటాద్రిపై దేవునిఁ గొలువక [4]గరివడే(?) భవమెల్ల కర్మశేషం	॥ఎన్నాళ్ళ॥

---

^[1] నిడురేకు 88 - అంతటను ‘కర్మశేషము’ అనియే. కాని యిది లయవిరుద్ధముగాఁ దోఁచెడిని.

^[2] ‘బ్రగ్ఞ’ రేకు.

^[3] ‘నైనను’ పూ.ము.పా.

^[4] గరివడు = మోటువారుట కావచ్చు.