ఆంధ్రభారతి - తాళ్లపాక అన్నమాచార్య కీర్తనలు - భావించరే చెలులాల పరమాత్ముని - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 229-4
సంపుటము: 3-165

తాళ్లపాక అన్నమాచార్య

రాగము: శ్రీరాగం

భావించరే చెలులాల పరమాత్ముని చేవదేరి చిగురులో చేఁగయై యుండెను	॥పల్లవి॥
మలసి పన్నీట హరి మజ్జనమాడేవేళ కలశాబ్ధిఁ దేలే మాణికమువలె నుండెను అలరి కప్పుర కాపు అవధరించేటి వేళ మొలచిన వెన్నెల మొలకయై యుండెను	॥భావిం॥
అంచలఁ దట్టుపుణుఁగు అవధరించేటి వేళ యెంచ నంజనాద్రిపై యేనుగై వుండెను మించిన హారములెల్ల మేన నించుకొన్న వేళ మంచిమంచి నక్షత్ర మండలమై యుండెను	॥భావిం॥
వున్నతి నలమేల్మంగ నురమున నుంచు వేళ పెన్నిధై పూచినట్టి సంపెంగవలె నుండెను వన్నె శ్రీవేంకటేశుఁడు వరములిచ్చేటి వేళ తిన్ననై యందరి భాగ్యదేవతయై యుండెను	॥భావిం॥