ఆంధ్రభారతి - తాళ్లపాక అన్నమాచార్య కీర్తనలు - నేరనైతి నింతేకాక నే నిన్నాళ్లు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 229-6
సంపుటము: 3-167

తాళ్లపాక అన్నమాచార్య

రాగము: పాడి

నేరనైతి నింతేకాక నే నిన్నాళ్లు యే రీతి విచారించినా నిదివో నిశ్చయము	॥పల్లవి॥
నాకుఁగా వేరొకరు విన్నపము సేసేరా నీకు వాకుచ్చి నేనే ఆడవలెఁ గాక యీకడ నాకంటే హీనునిఁక నీవు గా(౦)చేవా శ్రీకాంతుఁడ యిఁక నీ చిత్తమింతే కాక	॥నేర॥
నీవల్ల బతుకలేక నేనొకరి వేఁడేనా వావిరి నిన్నే కొసరవలెఁ గాక నీ వితరణగుణము నీలోనే దాఁచుకొనేవా సోవ నావంటివారికిఁ జూపవలెఁ గాక	॥నేర॥
తల్లికి లేని ముద్దు దాదికిఁ గలదా మరి చెల్లుబడి నీవే దయ సేయుటఁ గాక తొల్లె శ్రీవేంకటేశ్వర తూరి నాలో నున్నాఁడవు చల్లఁగా నీ చనవిచ్చి జరుపుటఁ గాక	॥నేర॥