ఆంధ్రభారతి - తాళ్లపాక అన్నమాచార్య కీర్తనలు - నీకు నాకు నెట్టుగూడె నీ వెట్టు నన్నేలితివి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 230-6
సంపుటము: 3-173

తాళ్లపాక అన్నమాచార్య

రాగము: మాళవిగౌళ

నీకు నాకు నెట్టుగూడె నీ వెట్టు నన్నేలితివి యీ కరుణకే మొక్కితి నిందిరారమణా	॥పల్లవి॥
కమలాక్ష నీ వనంతకల్యాణగుణనిధివి అమితదుర్గుణరాసి నన్నిటా నేను అమరఁగ స్వతంత్రుఁడ వటు నిన్ను నెంచితేను తమి నించుకంతా స్వతంత్రుఁడ నేఁ గాను	॥నీకు॥
దేవ నీవైతే సర్వదేవరక్షకుఁడవు నే జీవుఁడ నింద్రియాలఁ బెంచేవాఁడను ఆవల బ్రహ్మాండాల కన్నిటాఁ బొడవు నీవు భావించ నేనణువై పరగేటివాఁడను	॥నీకు॥
నానార్థసంపన్నుఁడవు నావల్ల నేమి గంటివి ఆనుక నా యంతర్యామివై పాయవు శ్రీనిధివి నీవైతే శ్రీవేంకటాద్రిపతివి దీనుఁడ నొకఁడ నేను ద్రిష్టించి కాచితివి	॥నీకు॥