ఆంధ్రభారతి - తాళ్లపాక అన్నమాచార్య కీర్తనలు - కలిమి గలిగియు నధమగతి యదేల - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 233-2
సంపుటము: 3-187

తాళ్లపాక అన్నమాచార్య

రాగము: వరాళి

కలిమి గలిగియు నధమగతి యదేల బలిమి గలిగియు లోఁగి బతిమాలనేల	॥పల్లవి॥
ఇలువేలుపొకఁడు హరి ఇంటనే వుండఁగా పలు వేలుపులతోడి భ్రమతలేల మెలఁగి సూర్యుఁ డొక్కఁడు మిక్కిలిని వెలుఁగఁగా వెల లేని దీపములు వేయి నేమిటికి	॥కలి॥
హరిభక్తి యొక్కటే ఆత్మలో నుండగా పరయుక్తు లెంచేటి పనులేల సిరులఁ జింతామణటు చేతిలో నుండఁగా సరి గాజుఁబూస మెచ్చఁగ నదేమిటికి	॥కలి॥
నాలుకను మంచి హరినామ మొకటుండగా గాలిఁ బోయెటి వూరగాథ లేల యీలీల శ్రీవేంకటేశుఁ డెదుటనె వుండగా మూలలకుఁ జేచాఁచి మొక్క నిఁకనేలా	॥కలి॥