ఆంధ్రభారతి - తాళ్లపాక అన్నమాచార్య కీర్తనలు - పసిఁడి యక్షంతలివె పట్టరో వేగమే రారో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 234-3
సంపుటము: 3-194

తాళ్లపాక అన్నమాచార్య

రాగము: సామంతం

పసిఁడి యక్షంతలివె పట్టరో వేగమే రారో దెసలఁ బేరటాండ్లు దేవుని పెండ్లికిని	॥పల్లవి॥
శ్రీవేంకటేశ్వరునికి శ్రీమహాలక్ష్మికి దైవికపుఁ బెండ్లిముహూర్తము నేఁడు కావించి భేరులు మ్రోసె గరుడధ్వజంబెక్కె దేవతలు రారో దేవుని పెండ్లికిని	॥పసిఁ॥
కందర్పజనకునికిఁ గమలాదేవికిఁ బెండ్లి పందిలిలోపలఁ దలఁబ్రాలు నేఁడు గందమూ విడెమిచ్చేరు కలువడాలు గట్టిరి అందుక మునులు రారో హరి పెండ్లికిని	॥పసిఁ॥
అదె శ్రీవేంకటపతి కలమేలుమంగకును మొదలి తిరుణాళ్లకు మొక్కేము నేఁడు యెదుట నేఁగేరు వీరె యిచ్చేరు వరములివె కదలి రారో పరుష ఘనుల పెండ్లికిని	॥పసిఁ॥