ఆంధ్రభారతి - తాళ్లపాక అన్నమాచార్య కీర్తనలు - ఎన్నఁడు వివేకించే దీడేరె దెన్నఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 236-1
సంపుటము: 3-204

తాళ్లపాక అన్నమాచార్య

రాగము: వరాళి

ఎన్నఁడు వివేకించే దీడేరె దెన్నఁడు యెన్నిలేవు జీవిపాట్లేమి చెప్పే దిఁకను	॥పల్లవి॥
నరజన్మమునఁ బుట్టి నానాభోగాలు మరిగి హరి నెరఁగక మత్తుఁడై వుండును సురలోకము చొచ్చి సుకృతి ఫలములంది గరిమ విజ్ఞానమార్గము విచారించఁడు	॥ఎన్నఁ॥
పెక్కుగాలము బ్రతికి పెనుఁగోరికలే కోరి అక్కడ విష్ణుఁ గొల్వక అలసుఁడౌను మిక్కిలిఁ దపముచేసి మించైనఘనత కెక్కి తక్కక పరమమైన తత్త్వము దెలియఁడు	॥ఎన్నఁ॥
వేవేలుబుద్ధులు నేర్చి వేడుక సంసారియై శ్రీవేంకటేశుఁ జెందక చింతఁ గుందును దైవ మాతఁడే దయదలఁచి మన్నించుఁగాని భావించి తనంతనైతే భవములఁ బాయఁడు	॥ఎన్నఁ॥