ఆంధ్రభారతి - తాళ్లపాక అన్నమాచార్య కీర్తనలు - నీవొక్కఁడవే యిత్తువు నిన్నుఁ గొల్చినవారికి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 236-2
సంపుటము: 3-205

తాళ్లపాక అన్నమాచార్య

రాగము: దేశాక్షి

నీవొక్కఁడవే యిత్తువు నిన్నుఁ గొల్చినవారికి శ్రీవల్లభుఁడవు రక్షించవే నారాయణా	॥పల్లవి॥
పెక్కుజీవులు భువినిఁ బెరిగేరు మోక్షము వొక్కరునుఁ దెచ్చి యియ్యనోప రెవ్వరు అక్కజపుధనరాసు లంగళ్లలోనున్నవి గక్కనఁ గొనేమంటే మోక్షము గొనరాదు	॥నీవొ॥
వున్నవి పుణ్యకర్మాలు వొడ్డి యందే మోక్షము మిన్నక యెక్కేమంటే మెట్లు గావు యెన్నఁగ సంసారధర్మ మిదివో మోక్షము చూప చన్నమన్నవారికెల్లా సాధనము గాదు	॥నీవొ॥
పదునాల్గులోకములు పన్నివున్నవి మోక్షము తుదకెక్కించ నవైనాఁ దోడుగావు యిదివో శ్రీవేంకటేశ యిహపరము లొసఁగి హృదయములో నున్నాఁడ వింకనేల చింత	॥నీవొ॥