ఆంధ్రభారతి - తాళ్లపాక అన్నమాచార్య కీర్తనలు - మాయామయములివి మాయకు నీ వేలికవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 236-5
సంపుటము: 3-208

తాళ్లపాక అన్నమాచార్య

రాగము: సామంతం

మాయామయములివి మాయకు నీ వేలికవు చాయకుఁ దెచ్చేనంటే స్వతంత్రుఁడ నయ్యేనా	॥పల్లవి॥
తెగని కోరిక తానే తీఁగెవలె నల్లుకోఁగా తగదని మానుప నా తరమయ్యీనా వగలఁ గోపము పామువలె నాలుక చాఁచఁగ పగటు తోడఁ దొడికి పట్టఁగ నేరుతునా	॥మాయా॥
వయసు తానే మేఘమువలె సోన గురియఁగా జయించి నే దాని నణఁచఁగ నోపేనా లయించక లోభము జలఁగవలెఁ బీరుచఁగా నియమించి మట్టుపెట్ట నేఁడు నాకు వసమా	॥మాయా॥
యేపున గర్వము దానే యేనుగవలె మీరఁగా చేపట్టి చిక్కించుకో నాచేత లోనౌనా యేపొద్దు శ్రీవేంకటేశ యివి వాని స్వభావాలు కాపాడవే నన్ను నే నెక్కఁడా నీ దాఁసుడను	॥మాయా॥