ఆంధ్రభారతి - తాళ్లపాక అన్నమాచార్య కీర్తనలు - మనుజు లూరకే తాము మరఁగులంటా నుందురు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 241-6
సంపుటము: 3-238

తాళ్లపాక అన్నమాచార్య

రాగము: లలిత

మనుజు లూరకే తాము మరఁగులంటా నుందురు యెనసి దేవుఁడు సేసే నిందరికి మాయ	॥పల్లవి॥
వినికందరి కొక్కటే వివరములే వేరు కనుచూపులు నొక్కటే కాంక్షలే వేరు మనసూ నొక్కటే లోనిమర్మములే వేరు తనివియు నొక్కటే తనువులే వేరు	॥మను॥
లోకమును నొక్కటే లోనువెలుపల వేరు వాకు లొక్కటే భాషలవరుసే వేరు జోక నాహార మొక్కటే సొరిది రుచులే వేరు కైకొన్నరతి యొక్కటే కందువలే వేరు	॥మను॥
పరిమళ మొక్కటే భాగించుకొనుటే వేరు యిరవైన దొక్కటే యింపులే వేరు అరిది శ్రీవేంకటేశ అన్నిటా నీదాఁసుడు(ల?) శరణాగతి యొక్కటే జాతులే వేరు	॥మను॥