ఆంధ్రభారతి - తాళ్లపాక అన్నమాచార్య కీర్తనలు - అందితినిఁ బొందితి నీయం దఖిలభోగములు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 268-5
సంపుటము: 3-393

తాళ్లపాక అన్నమాచార్య

రాగము: ధన్నాసి

అందితినిఁ బొందితి నీయం దఖిలభోగములు కందర్పజనక నాకుఁ గలిగితి విన్నిటా	॥పల్లవి॥
ఘనకుండలములు నీ కథలు నాచెవులకు ననుపైన రుచులు నీ నామములు నాలుకకు అనువై నీకు మొక్కఁగ నంటిన నొసలిమన్ను పనివడి నీకు పట్టబద్ధ(ంధ?)ము	॥అంది॥
మంచి నిర్మాల్యపుదండ మంగళసూత్రము నాకు కాంచనపురాసి నీ చక్కని రూపు నామతికి పంచామృతములు నీ పాదతీర్థము మేనికి పంచినముద్ర లదే వజ్రాంగిజోడు	॥అంది॥
సకలబంధులు నీ దాసానదాసులే నాకు అకలంక జన్మఫల మన్నిటా నీకృప నాకు ప్రకటపు శ్రీవేంకటపతివి నాయాతుమలో మొకరివై యుండి నన్ను మోహించఁజేసితివి	॥అంది॥