ఆంధ్రభారతి - తాళ్లపాక అన్నమాచార్య కీర్తనలు - వాసివంతు విడిచినవాఁడే యోగి, యీ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 27-6
సంపుటము: 1-167

తాళ్లపాక అన్నమాచార్య

రాగము: సాళంగనాట

వాసివంతు విడిచినవాఁడే యోగి, యీ ఆసలెల్లా విడిచిన అతఁడే యోగి	॥వాసి॥
గద్దించి పారెడు తురగమువంటి మనసు వద్దని మరలించినవాఁడే యోగి వొద్దనే కొండలవంటి వున్నత దేహగుణాలు దిద్ది మట్టుపెట్టువాఁడే ధీరుఁడైన యోగి	॥వాసి॥
ముంచుకొన్న యింద్రియపు మోహజలధిలోన వంచన మునుఁగనట్టివాఁడే యోగి పొంచి పుణ్యపాపములు పొట్టువంటి కర్మములు దంచి పారఁజల్లువాఁడే తత్త్వమైన యోగి	॥వాసి॥
వెగటుకామాదుల వెళ్ళఁగొట్టి శాంతుఁడై వగలుడిగినయట్టివాఁడే యోగి నిగిడి శ్రీవేంకటపతి నిజదాసుఁడై భక్తిఁ దగిలి నిలుపువాఁడే ధన్యుఁడైన యోగి	॥వాసి॥