ఆంధ్రభారతి - తాళ్లపాక అన్నమాచార్య కీర్తనలు - తొలుఁ బాపపుణ్యాలతోడఁ బుట్టితినట - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 28-1
సంపుటము: 1-169

తాళ్లపాక అన్నమాచార్య

రాగము: సాళంగం

తొలుఁ బాపపుణ్యాలతోడఁ బుట్టితినట బలువైన భవములఁ బడలేనా	॥తొలు॥
గాముల యింటనే కాఁపనయితినట పాముపుట్టనుండియైన బతుకలేనా గోమున హేయపుఁ గుండకూడు నించితినట గామిడి ^[1]నేగారేతిత్తిఁ గానోపనా	॥తొలు॥
కట్టైన గుణములచే కట్టువడితినట చుట్టపు బంధాలరొచ్చుకు నోపనా దట్టపుటాసల నేఁ దాల్చితినట నా వెట్టకాయము మోవ వెఱచేనా	॥తొలు॥
^[2]నిగిడిన లోపల నీ వుండుదట పగవారికి నేఁ బగిలేనా తగువేంకటేశ నీదయవాఁడనట యీ వగల నిన్నిఁట గెలువఁగలేనా	॥తొలు॥

^[1] ‘నేగారేతిత్తిఁ’ =నేయిగారుతిత్తిని కావచ్చు.

^[2] ‘నిగిడి నాలోపల’ కావచ్చు.