Display:
అధ్యాత్మ సంకీర్తన
రేకు: 3-6
సంపుటము: 1-19
తాళ్లపాక అన్నమాచార్య
రాగము: ముఖారి
చిత్తములో నిన్నుఁ జింతించనేరక
మత్తుఁడఁనై పులుమానిసినైతి
॥పల్లవి॥
అరుత లింగము గట్టి యది నమ్మఁజాలక
పరువతమేఁగిన బత్తుడఁ నైతి
సరుస మేఁకపిల్లఁ జంకఁబెట్టుక నూఁత-
నరయు గొల్లనిరీతి నజ్ఞాని నైతి
॥చిత్త॥
ముడుపు కొంగునఁగట్టి మూలమూలలవెదకే-
వెడమతినై నే వెర్తుడ నైతి
విడువ కిక్కడ శ్రీవేంకటేశ్వరుఁ డుండ
పొడగానక మందబుద్ధి నేనైతి
॥చిత్త॥
AndhraBharati AMdhra bhArati - telugu కీర్తన సాహిత్యము